Алиу: Очекувам објективни резултати од анализата на кардиолошките и кардиоваскуларните интервенции
Министерот за здравство, Азир Алиу, утрово одржа состанок со интерната комисија задолжена за изготвување прелиминарна анализа на кардиолошките и кардиоваскуларните интервенции во здравствените установи во земјата. На средбата присуствуваа и заменик-министерот Јовица Андовски и директорот на Фондот за здравствено осигурување, Сашо Клековски.
Комисијата е формирана со цел собирање, обработка и анализа на податоци за периодот од 2022 до 2025 година во јавните и приватните здравствени установи.
„Очекувам комисијата да испорача резултати, кои се објективни и произлегуваат од максимално професионално и независно спроведен процес. Резултатите од работата ќе бидат важни од аспект на реално утврдување на состојбите и поставување цврста основа за унапредување на менаџирањето во здравството,“ порача министерот Алиу.
Комисијата е составена од врвни експерти во областа, како и правници и економисти. Меѓу нив се д-р Васил Папестиев (Клиника за кардиохирургија), д-р Билјана Зафировска и д-р Иван Василев (Клиника за кардиологија), д-р Мишел Андонов и д-р Илир Вела (Клиника за торакална и васкуларна хирургија), д-р Ненси Лозанче (Клиничка болница Битола), д-р Валон Асани (Клиничка болница Тетово), д-р Никола Христов (Клиника „Жан Митрев“), д-р Жарко Христовски („Аџибадем Систина“), како и претставници од ФЗОМ – д-р Ана Митевска и д-р Жаклина Крстевска. Дел од комисијата се и правникот Стефанка Петковска и претставници од Министерството за здравство – д-р Александар Митов, Стојанчо Стојковски и Бахар Љама.
Истовремено, Министерството за здравство испрати допис до јавните здравствени установи за доставување податоци за бројот на извршени процедури и операции во периодот јануари 2022 – август 2025 година. Станува збор за интервентни кардиолошки процедури како коронарографии и стентирања, васкуларни ангиографии, како и кардиохируршки и васкуларни операции.
Од Министерството најавија дека процесот ќе биде максимално транспарентен. Наодите од интерната комисија ќе бидат доставени до стручна комисија составена од странски експерти, а извештајот ќе биде објавен на веб-страницата на Министерството за здравство.
