Тунелот „Железница“ на автопатот „Струма“ со номинација за најдобар европски проект

Тунелот „Железница“ на автопатот „Струма“ влезе меѓу петте финалисти во натпреварот за најдобар европски проект, информира Агенцијата за патна инфраструктура (АПИ) на Бугарија.

Гласањето ќе трае до 15 октомври, а вкупниот број кандидатури годинава е 266 од сите земји-членки на Европската унија. Бугарија се вклучи во конкуренцијата со 17 предлози, а за последната фаза проектите биле оценувани од жири назначено од Европската комисија.

Тунелот „Железница“ е долг околу 2 километри и има две одделни цевки за сообраќај. Меѓу нив се изградени четири попречни врски за пешаци и уште две за автомобили, наменети за амбулантни возила, противпожарни и други специјализирани машини. Во случај на сообраќајна несреќа или затворање на една од цевките, тие ќе служат за безбедно извлекување на патниците. Проектот предвидува и платформа за хеликоптери.

АПИ ќе го претстави проектот во рамките на Европската недела на регионите и градовите, која ќе се одржи во средината на октомври во Брисел. Победниците по категории ќе бидат објавени на официјалната церемонија, врз основа на оценките на меѓународното жири.