Желјазков: Бугарија вложува максимални напори во заштитата на надворешните граници на ЕУ и во борбата со криумчарењето на мигранти

„Бугарија вложува максимални напори за обезбедување стабилна заштита на надворешните граници и за спротивставување на незаконските активности на мрежите за трговија и криумчарење на мигранти.“ Ова го изјави бугарскиот премиер Росен Желјазков за време на учеството на самитот посветен на темата за миграцијата, организиран од премиерката на Италија Џорџа Мелони и премиерката на Данска Мете Фредериксен.

Средбата се одржа пред седницата на Европскиот совет и собра европски лидери за дискусија околу заедничките предизвици во управувањето со миграциските процеси, заштитата на надворешните граници на ЕУ и зајакнувањето на партнерството со трети држави.

Премиерот Желјазков истакна дека враќањето на нелегалните мигранти е клучен елемент за ефективно управување со миграцијата. Тој изрази поддршка за создавање заеднички европски систем за враќање, заснован на задолжително меѓусебно признавање на одлуките за враќање. Желјазков ја нагласи важноста од интензивна комуникација со трети земји кои претставуваат миграциски ризик и ја поздрави активната улога на Европската комисија и агенциите на ЕУ во тој процес.

Како позитивен пример, премиерот посочи на заедничкото писмо за доброволни и присилни враќања во Авганистан, потпишано од 20 министри за внатрешни работи на земјите членки на Унијата, меѓу кои и Бугарија. Според него, иницијативата ќе придонесе за покоординиран и поефикасен европски одговор на предизвиците поврзани со враќањата.

Желјазков ја поздрави и тековната работа на ЕУ за усовршување на правилата поврзани со концептот на „безбедна трета држава“ и листата на „држави на потекло што се сметаат за безбедни“, нагласувајќи дека Бугарија ќе остане конструктивен и сигурен партнер во претстојните разговори.

Бугарскиот премиер ја потврди поддршката на земјата за иновативни решенија во областа на миграцијата, вклучувајќи создавање европска правна рамка за центри за враќање, во согласност со меѓународното право и со почитување на основните човекови права.

Во заклучок, Желјазков подвлече дека трајното решение на миграциските предизвици бара одржлив развој во земјите на потекло и транзит, при што следната Мултигодишна финансиска рамка на ЕУ треба да обезбеди доволно ресурси за флексибилно финансирање во таа насока.