Древниот град Хераклеја Синтика меѓу 15-те чуда на Бугарија за 2025 година
Древниот град Хераклеја Синтика, лоциран во близина на Петрич, е меѓу 15-те објекти избрани во јубилејното издание на иницијативата „Чудата на Бугарија“, која оваа година се одржува по петнаесетти пат. Веста ја потврди за БТА инж. Катја Стојанова – раководител на проектот „Реставрација, конзервација и социјализација на Хераклеја Синтика“ и директорка на Историскиот музеј во Петрич, пренесува Пиринско.
Кампањата, организирана од здружението „Културно наследство“ – бугарскиот претставник на Europa Nostra, има за цел да ја промовира и поттикне заштитата на културно-историското наследство на Бугарија. Секој граѓанин може да гласа за својот фаворит меѓу 15-те номинирани објекти, а крајниот рок за гласање е 30 октомври 2025 година. Гласањето се одвива електронски преку веб-страницата на агенцијата „Стандард“ (www.standartnews.com).
Археолошкиот локалитет Хераклеја Синтика, кој се наоѓа во подножјето на планината Кожуф, е еден од најзначајните антички градови во Југозападна Бугарија. Во последните години, благодарение на континуираните напори на локалната власт и на тимот археолози предводен од проф. Људмил Вагалински, местото се разви во важен центар за љубителите на историјата и културниот туризам, потсети Стојанова.
Свечената церемонија за доделување на наградите ќе се одржи на 1 ноември 2025 година во 19:00 часот во Народниот театар „Иван Вазов“ во Софија. Ќе бидат врачени јубилејните признанија за културно наследство во неколку категории: „Чудо на Бугарија за последните 15 години“ (археолошко откритие), „Атракција на Бугарија за последните 15 години“ (културно-историска атракција) и „Бренд“ (туристичка дестинација). Ќе се доделат и специјални награди „Чувар на духовните чуда на Бугарија“ и „Памет“ (за најдобар музеј, библиотека и читалиште).
Годишните награди „Чудата на Бугарија“ се единствените национални признанија посветени на културното наследство во земјата и веќе 15 години претставуваат симбол на признание и престиж за историчарите, археолозите, градоначалниците, музеите и бизнисот кои заеднички ги откриваат и промовираат чудата на Бугарија.
