Урдан: Како што Милошевиќ беше казнет, така и Русија ќе сноси одговорност за злосторствата во Украина

Скептицизмот кон меѓународната правда за време на војна е честa појава, но искуството од поранешна Југославија покажува дека чувството на неказнивост со текот на времето исчезнува. Ова го изјави специјалниот дописник на „Монд“, Реми Урдан, во коментар за „Укринформ“, нагласувајќи дека во Украина правдата веќе се смета за клучен предуслов за идниот мир, пренесува БГНЕС.

Урдан потсетува на мај 1993 година, кога Советот за безбедност на ОН го основа Меѓународниот кривичен трибунал за поранешна Југославија, што тогаш било дочекано со потсмев и недоверба, дури и меѓу жртвите. „Пет години подоцна, кога надлежноста на Трибуналот беше потврдена за злосторствата во Косово, луѓето веќе сами доаѓаа да сведочат и да доставуваат докази. Идејата за неизбежна правда се вкорени“, истакна тој.

Според него, откривањето на препогребани масовни гробници во Косово покажува дека сторителите почнале да се плашат од одговорност и да ги прикриваат трагите.

Урдан нагласи дека во Украина е силно присутна свеста за правдата, бидејќи граѓаните уште од првиот ден самостојно ги документираат злосторствата и собираат докази. „Никој не чека некој друг да дојде и да истражува“, рече тој.

Иако смета дека Русија ќе се спротивставува на какви било судски процеси, Урдан е уверен дека правдата ќе биде остварена. „Денес е тешко да се замисли точниот формат, но постојат и други патишта – национални судови, универзална јурисдикција и нови, креативни решенија. Историјата покажува дека казната на крајот е неизбежна“, заклучи тој.