Бугарскиот национален празник 3-ти Март беше одбележан во Генералниот конзулат на Бугарија во Одеса

По повод Националниот празник на Бугарија – 3 Март, Генералниот конзулат во Одеса одржа средба со 160 претставници на бугарската заедница од Одеска, Херсонска и Николаевска област. Настанот започна со минута молчење во чест на загинатите украински и бесарабски Бугари во војната, јавува БТА.

Генералниот конзул Светослав Иванов истакна дека заедницата е дел од историјата на Бугарија и треба да се гордее со своето потекло. Тој потсети дека по обновувањето на работата на конзулатот во мај 2023 година се води активна културна дипломатија за поддршка на Бугарите во регионот и редовно одбележување на 3 Март.

Официјален гостин на настанот беше Росица Кирова, претседател на Комисијата за директно учество на граѓаните и интеракција со граѓанското општество во бугарскиот парламент. Таа нагласи дека празникот е ден на благодарност и духовно единство и дека поддршката на бугарските заедници надвор од Бугарија останува нејзина лична кауза.

Во рамки на настанот Кирова донираше 4850 тетратки, учебници и помагала за 12 бугарски неделни училишта во Одеската област. Беше отворена и изложба на уметници од бугарско потекло од Измаил, а културна програма изведоа бугарски фолклорни состави.

Според последното официјално пребројување, бугарската заедница во Одеската област брои над 150.000 луѓе, од кои околу 50–60 илјади живеат во Одеса.