Одржан Денот за високи гости на вежбата „Блесок 26“

Денес, 27 април 2026 година, на армискиот полигон „Криволак“ беше реализиран Денот за високи гости на вежбата „Блесок 26“.

На настанот присуствуваа: претседателката и врховен командант на Вооружените сили Гордана Сиљановска-Давкова, министерот за одбрана Владо Мисајловски, началникот на Генералштабот на Армијата генерал-мајор Сашко Лафчиски, командантот на НАТО корпусот за брзо распоредување-Грција генерал-потполковник Григориос Боунтлиакис, началникот на Ј-9 на Командата на здружените сили на НАТО во Неапол контраадмирал Торстен Маркс, генерали од Армијата, воено-дипломатскиот кор, претставници од локалната самоуправа и други гости.

Во своето обраќање претседателката Гордана Сиљановска-Давкова рече: „Нашата Армија е фактор на стабилност и чувар на глобалниот мир. Денес повеќе од 180 припадници на Армијата, под македонското знаме, се вклучени во мировни мисии и операции. Таа додаде и дека „Силата на една современа Армија не се мери само со опремата којашто ја поседува, туку и со меритократијата во регрутирањето и унапредувањето, постојана стручна надградба и достоинствени услови за живот и за работа на луѓето во униформа“. Претседателката на државата нагласи дека „Вежбата БЛЕСОК 26 е охрабрувачка и инспиративна потврда дека македонската Армија ја разбира природата на времето во кое живееме и сериозно се подготвува за соочување со предизвиците што ги носи“.

Министерот Мисајловски по изведувањето на показната вежба истакна дека присутните „беа сведоци не само на демонстрација на способности, туку и на дисциплина, прецизност и висок професионализам“, укажувајќи на тоа дека оценката „борбено подготвена“ е резултат на мотивираноста и способностите на армиските припадници, како и интензивниот процес на модернизација и опремување на македонската Армија. „Македонската Армија прави историски чекор напред во поглед на своите капацитети. Оперираме со нова, софистицирана опрема, како и секоја друга НАТО – армија. Нашите припадници се на исто ниво со останатите од Алијансата. Имаме целосна интероперативност, која ни овозможува заеднички да го одбраниме она што ние нам најсвето, а тоа е слободата, татковината, демократијата. Да ги одбраниме нашите вредности кои се вкоренети во македонското општество“, истакна министерот. Мисајловски упати честитки до сите армиски припадници вклучени во организацијата и реализацијата на оваа вежба, за која рече дека е исклучително сложена имајќи предвид дека над 1.500 армиски припадници работеа на фиктивно сценарио со 25 настани и над 100 инциденти.

Началникот на Генералштабот на Армијата, генерал-мајор Сашко Лафчиски, во своето обраќање наведе: „Нашата најголема НАТО цел на способност, Лесната пешадиска баталјонска група се здоби со статус „mission capable“ или „борбено подготвена“. Огромен успех којшто е резултат на јасна стратегиска насока и напорна работа. Успех којшто се темели на одржлив и систематски процес на планирање, подготовка, обука, опремување и модернизација, реализиран во согласност со највисоките НАТО стандарди“. Генералот притоа дополни „Зад ова достигнување стои колективниот напор на сите припадници на Армијата. Достигнување коешто е резултат на исклучителната синергија помеѓу Армијата и Министерството за одбрана, јасно дефинирана преку стратешки насочената мисија и кохезија“.

Контраадмиралот Торстен Маркс во своето обраќање потенцираше дека нашата држава е силен и доверлив НАТО сојузник наведувајќи: „Од приклучувањето кон НАТО во 2020 година, вие значително ја подобривте вашата одбранбена позиција. Инвестирате над 2 проценти од БДП во одбраната и придонесувате во мисиите на НАТО, вклучувајќи ги КФОР и борбените групи на НАТО. Ова покажува вистинска посветеност на Алијансата и нашата заедничка безбедност, оценувајќи ги единиците според стандардите на НАТО“. Притоа тој истакна: „БЛЕСОК 26 јасно ја демонстрира интероперабилноста на дело“, потенцирајќи го задоволството што Лесната пешадиска баталјонска група е оценета како „борбено подготвена за извршување на својата мисија“.

Вежбата „БЛЕСОК 26“ е продолжение на серијалот вежби „Македонски Блесок“. На оваа вежба, на која учествуваа над 1.500 припадници од Армијата, се изврши и оценување на НАТО целта на способност – Лесна пешадиска баталјонска група (ЛПБГ), при што од страна на оценувачкиот тим и НАТО мониторите, единицата се стекна со статусот „борбено подготвена за извршување на својата мисија“. Со оцената, ЛПБГ ја потврди својата обученост, високата борбена подготвеност и интероперабилност со сојузниците.