Охрид ги чека Бугарите: Секогаш сте добредојдени

Охрид пречекува бројни туристи со својата неповторлива атмосфера – езерото, старите улици со калдрма и животот под ѕидините на Самоиловата тврдина. Во култните угостителски објекти во градот, разговорот брзо доаѓа до темата што го загрижува локалниот бизнис – а имено значително намалениот број бугарски туристи, се вели во материјал на БГНЕС.

На прашањето дали се чувствува намалување на бројот на гостите од Бугарија, келнер во еден од познатите локални ресторани без двоумење му одговара на репортерот на БГНЕС дека „пропагандата нанесува штета и ги плаши Бугарите. Како да се двоумат да доаѓаат како порано“.

Го прашуваме како тоа се одразува врз градот. Неговиот одговор е краток:

„Сите губиме – угостители, трговци, келнери.“

Разговорот ни го прекинуваат нарачките, но келнерот се враќа со порака од кујната. Готвачот исто така сака неговите зборови да стигнат до нас:

„Кажете им на Бугарите дека ќе задоцниме со нарачката, но за нив ќе биде највкусното и најдоброто.“

Прашањето кога започнал падот во бројот на гостите од Бугарија, келнерот го поврзува со промената на политичката состојба.

„Падот на бугарските туристи дојде со промената на политичката ситуација. Порано имаше многу повеќе бугарски туристи. Цели хотели работеа само со Бугари, вклучително и јас“, раскажува тој.

Го прашуваме што најмногу му недостига на локалниот бизнис. Тој веднаш ги посочува организираните собири на бугарските друштва.

„Забавите на бугарските друштва за нас беа како Божиќ. Заработувавме по 200 евра по човек. Веќе ги нема. Ако децата на политичарите војуваа, властите немаше да започнуваат конфликти“, вели келнерот.

На прашањето дали се променил односот кон Бугарите во Охрид, одговорот е категоричен. Во ресторанот нагласуваат дека гостите од Бугарија се пречекуваат со почит и надеж дека повторно ќе се вратат.

При заминувањето од ресторанот, пораката до Бугарите е кратка и јасна:

„Секогаш сте добредојдени, ние не сме се промениле.“