Патниците од крузерот на кој избувна епидемијата на вирусот ќе бидат истоварени во Шпанија
Крузерот на кој избувна епидемијата на вирусот хантана ќе биде преместен на Канарските Острови објави синоќа шпанското Министерство за здравство. Тројца патници од бродот починаа откако исплови од Аргентина, на патување преку Атлантикот, пред околу еден месец.
Најавена е и итна евакуација на неколку заразени патници од бродот со медицински опремен авион.
На бродот сè уште има 149 лица од 23 земји и тие се подложени на „строги мерки на претпазливост“, изјави операторот на бродот, „Oceanwide Expeditions“.
Патувањето до Канарските Острови ќе трае три до четири дена, а беше одлучено дека бродот потоа ќе биде испратен во Шпанија, бидејќи Светската здравствена организација (СЗО) процени дека Зелено’ртските Острови немаат капацитет да примаат патници од бродот на кој избувна инфекцијата.
Шпанското Министерство за здравство објави дека сè уште не е одлучено во кое пристаниште ќе пристигне бродот.
Операторот на крстарење објави дека планот е да отплови до Гран Канарија или Тенерифе. Како што објави операторот, Светската здравствена организација објасни дека оваа операција не може да се спроведе на островите Капо Верде.
„Канарските Острови се најблиската локација со потребните капацитети. Шпанија има морална и законска обврска да им помогне на овие луѓе, меѓу кои има и неколку шпански граѓани“, се наведува во соопштението на операторот.
Кога ќе пристигнат на Канарските Острови, патниците ќе бидат прегледани ќе им биде пружена потребната грижа, а потоа ќе можат да почнат да се враќаат во своите домови, изјави шпанското Министерство за здравство, објавува британскиот „Гардијан“ на својот портал.
„Сите интеракции со лицата кои биле на бродот ќе бидат извршени, на посебни места и со посебен транспорт специјално подготвен за оваа ситуација“, изјави министерството.
Шпанското Министерство додаде дека ова е направено со цел да се избегне каков било контакт со локалното население и да се обезбеди безбедноста на здравствениот персонал.
Двајца членови на екипажот, вклучувајќи еден британски лекар, побарале итна медицинска помош и требало да бидат евакуирани со болнички авион на Канарските Острови вчера, јавува Би-Би-Си. Трето лице, роднина на германскиот државјанин кој почина на бродот, исто така требало да биде евакуирано.
Службениците утврдуваат кои патници имаат потреба од итна евакуација од островите Зелен ’Рт каде што бродот се закотвил, соопшти Министерството за здравство.
