Бугарија – Германија: од политички дијалог до индустриско партнерство

Бугарско-германските односи во периодот од 2009 до 2026 година прераснаа од класичен политички дијалог во стратешко и индустриско партнерство во рамките на ЕУ и НАТО, пишува во материјал на бугарската информативна агенција БГНЕС.

Германија останува најголем трговски партнер и еден од најважните инвеститори во Бугарија, со трговска размена што во последните години надминува 12 милијарди евра годишно. Германските инвестиции во бугарската економија изнесуваат повеќе од 4,2 милијарди евра, а значаен дел од нив се насочени кон автомобилската индустрија, технологијата и логистиката.

Во Бугарија работат компании како Siemens, Bosch, SAP, Lufthansa Technik, Lidl, Kaufland и DHL. Автомобилскиот сектор обезбедува над 80.000 работни места и учествува со околу 12% во БДП на земјата.

По 2022 година соработката се проширува и во одбранбената индустрија. Германскиот концерн Rheinmetall планира инвестиции поголеми од една милијарда евра за изградба на фабрики за муниција и барут, како и развој на проекти за дронови и воена електроника.

Германија има важна улога и во европската интеграција на Бугарија, вклучително и процесите поврзани со Шенген и еврозоната. Според анализата, до 2030 година се очекува дополнително продлабочување на соработката во одбраната, автомобилската електроника, вештачката интелигенција и енергетската трансформација.