(Видео) Радев и Фон дер Лајен разговараа за реформите, енергетиката и европската поддршка

Последните 5 г. на политичка нестабилност и предизвици во управувањето и владеењето на правото, не ни дозволуваа да го развиеме нашиот потенцијал, но сега работите се менуваат, изјави Радев.

Нашата унија има потреба од стабилност и сигурност, заедно со силна политика на кохезија и заедничка земјоделска политика за гарантирање на сигурноста на нашите граѓани. Мојата земја има клучна улога за стабилноста, сигурноста и диверзификацијата на енергетските испораки во Југоисточна Европа. Ова го изјави премиерот Румен Радев за време на прес-конференција со претседателката на ЕК Урсула фон дер Лајен, пренесува БГНЕС.

Последните 5 г. на политичка нестабилност и предизвици во управувањето и владеењето на правото, не ни дозволуваа да го развиеме нашиот потенцијал, но сега работите се менуваат – имаме стабилна влада, ориентирана кон реформи, со јасна агенда, стабилизирање на буџетот и услови за одржлив економски раст, искоренување на корупцијата, да бидеме одговорни за повеќе безбедносни и одбранбени капацитети во целиот регион. Беше важно да ги споделиме нашите приоритети. За нас ПВУ не е само извор на финансирање, на овој план гледаме како на солиден инструмент за суштински реформи. Во последните 3 г. малку заостанавме, но сме силно амбицирани да надоместиме и да ги почитуваме сите рокови до крајот на август, рече Радев. Ви благодарам за трезвената проценка и врз основа на нашите успеси во последните 2 недели да ги воведеме најважните законодавни акти за Комисијата за борба против корупцијата и за главниот обвинител, тоа ја деблокираше првата транша од средствата, нагласи Радев.

Бугарскиот енергетски систем има клучна улога за стабилноста во Југоисточна Европа и ние сериозно гледаме на ова прашање. ПВУ и Планот за праведна транзиција ќе придонесат за непречена транзиција и изградба на нови индустриски зони и отворање на нови објекти, така ќе има поголема сигурност во нашите претстојни напори Европа да биде постабилна, изјави Радев.

Ви благодарам за разбирањето и поддршката за големиот воден проект за ОИЕ, тоа ќе биде најголемата пумпна станица во Бугарија и по обврската да ги завршиме еколошките досиеја, можеме да користиме европски и национални средства, за да можеме да имаме такво складирање на енергија и тоа законски да биде уредено за целиот регион. Заедно, преку дискусии и дијалог, ќе постигнеме правично решение за да инвестираме во одбрана, конкурентност, но и политиката на кохезија се основни столбови во ЕУ, рече Радев. Гледајќи напред, има безбедносни предизвици и ве уверувам дека ќе го искористиме инструментот SAFE за подобрување на нашите одбранбени способности. Ова е само почеток на плодната соработка меѓу новата влада во Бугарија и ЕК, рече уште премиерот Радев.

Од своја страна, претседателката на ЕК Урсула фон дер Лајен изјави дека усвојувањето на еврото носи реални придобивки за Бугарија – и за граѓаните и за бизнисот.

Според Фон дер Лајен, заедничката валута „ги олеснува плаќањата и патувањето на луѓето“ и им дава можност на компаниите „целосно да имаат корист од единствениот европски пазар“. Таа истакна уште дека според многумина Бугари, преминот кон еврото поминал „мазно и ефикасно“, определувајќи го тоа како „наш заеднички успех“.

Фон дер Лајен честиташе и за резултатите од парламентарните избори, изјавувајќи дека тие ќе донесат „силно потребна стабилност“ не само за Бугарија, туку и за целиот регион.

Во текот на разговорите меѓу двајцата биле разгледани низа стратешки приоритети, насочени кон долгорочен просперитет и споделена сигурност. Меѓу главните теми биле реформите поврзани со Планот за закрепнување и отпорност.

„Програмата „Следна генерација ЕУ“ дава реални резултати на терен“, посочи претседателката на ЕК. Таа потсети дека Бугарија веќе добила близу 3,3 милијарди евра финансирање. Сепак, Фон дер Лајен предупреди дека крајниот рок за искористување на средствата е август 2026 г., поради што е неопходно реформите да продолжат со забрзано темпо.

Посебен акцент во обраќањето беше ставен врз борбата против корупцијата. Урсула фон дер Лајен го поздрави напредокот на Бугарија и го нагласи значењето на новата антикорупциска комисија.

„Создавањето на Комисија за борба против корупцијата е многу важно за ефикасното гонење на корупцијата на сите нивоа“, изјави таа и додаде дека е од клучно значење комисијата да работи независно.

Претседателката на ЕК го поздрави и започнатиот законодавен процес, како и реформите во обвинителството, насочени кон поефикасни истраги на корупциски кривични дела. Според неа, токму овие две клучни реформи ќе ѝ овозможат на Бугарија да отклучи близу 370 милиони евра европско финансирање.

„Ова е добра вест за Бугарија и за Европа, бидејќи борбата против корупцијата е многу важен приоритет за Европската унија“, нагласи таа.

Друга важна тема во разговорот била модернизацијата на бугарскиот енергетски систем и преминот кон чиста енергија. Европската комисија планира да ја поддржува Бугарија и регионот преку Фондот за праведна транзиција.

Фон дер Лајен истакна дека преминот кон чиста енергија треба да носи „нови работни места, раст и инвестиции“, а за Бугарија се предвидени вкупно 1,2 милијарди евра за зелени енергетски инвестиции во рамките на „Следна генерација ЕУ“.

Во рамките на средбата бил разгледан и следниот долгорочен буџет на Европската унија. Според претседателката на ЕК, Европа има потреба од „современ и флексибилен буџет“, кој ќе ги поддржува регионите, земјоделството и сигурноста на европските граѓани.

Двајцата со Радев разговарале и за геополитичките предизвици – војната во Украина, сигурноста на надворешните граници на ЕУ и кризата на Блискиот Исток.

„Заканите за сигурноста на нашата источна граница се предизвик за цела Европа“, предупреди Урсула фон дер Лајен. Таа ја нагласи важната улога на Бугарија за колективната одбрана и сигурноста на источниот крилo на НАТО и ЕУ.

„Ќе обезбедиме поддршка во износ од 3,2 милијарди евра преку механизмот SAFE и сме подготвени да продолжиме со работата за склучување на кредитниот договор“, рече уште Фон дер Лајен.