Бугарите купуваат сѐ повеќе имоти во Грција

Пазарот на недвижности во Грција испраќа први сигнали на смирување, но тоа не важи за бугарските купувачи, пишува бугарскиот дневен весник 24 часа. Во 2025 година странските инвестиции во грчки недвижности се намалиле на околу 2,05 милијарди евра, што е за над 20% помалку во споредба со рекордната 2024 година.

Спротивно на овој тренд, Бугарите ги зголемуваат своите купувања. Според податоците на Централната банка на Грција, во 2025 година тие купиле имоти во вредност од рекордни 101 милион евра, што е раст од 6,3% во однос на претходната година.

Падот на странските инвестиции се поврзува со построгите услови за програмата „златна виза“, при што минималната инвестиција во најбараните региони е зголемена на 800.000 евра, како и со повисоките цени и каматни стапки во Европа.

За бугарските купувачи, сепак, главниот мотив не е само профитот, туку комбинацијата од лично користење, близина и попристапни цени во Северна Грција.

Серес, Солун, Кавала и Халкидики остануваат најпосакувани дестинации. Во Серес постари станови може да се купат за 600 до 900 евра по квадратен метар, додека во Кавала и Халкидики цените се значително повисоки, особено за имоти покрај морето.