Петрова: Скопје да ги исполни условите на ЕУ, со Муцунски разговарам на бугарски и одлично се разбираме, не само Србија има интерес од конфликт

Недостигот од политичка волја за исполнување на преземените обврски го попречува напредокот на Северна Македонија кон Европската Унија. Ова го изјави министерката за надворешни работи Велислава Петрова-Чамова, јавува БГНЕС.

Петрова нагласи дека договореното не е билатерално, туку европско прашање и дека сите лидери во ЕУ се категорични дека единствениот пат напред за Скопје е исполнувањето на веќе преземените обврски.

„Тажно е да се види дека четири години подоцна, еден договор постигнат на европско ниво и поддржан со одлука на Парламентот на Република Северна Македонија, сè уште не може да се спроведе поради недостигот од политичка волја“, рече таа.

На прашањето на БГНЕС дали зад политиката на Скопје стои странско влијание, вклучително и во врска со предупредувањата во последниот извештај за Северна Македонија на Комисијата за надворешни работи на Европскиот парламент за опасниот концепт „Српски свет“, министерката одговори:

„Го цитиравте извештајот кој говори во таа насока. Не случајно зборував дека станува збор за прашање на политичко лидерство. Ако една политика се базира целосно на антитеза, а не на проевропска теза, нормално е да се бара излез од ваквите договорености. Не е задолжително да станува збор само за Србија. Во интерес на многу други држави е да има конфликт меѓу земјите од Западен Балкан и земјите членки на Европската Унија. Може да се бара таква причинско-последична врска на многу нивоа, но важен е крајниот резултат. Потребна е политичка волја кога се прават вакви договорености. Ако таа недостасува и е полесно да се гради политика врз основа на антитеза, тогаш нема да се стигне многу далеку“, изјави Петрова-Чамова.

На прашањето на БГНЕС зошто претседателката на Северна Македонија, Гордана Сиљановска-Давкова, се двоуми да зборува на македонски јазик во Софија, Петрова-Чамова одговори:

„Никогаш не сум се сретнала со неа. Во разговорите со министерот за надворешни работи (Тимчо Муцунски) јас зборувам на бугарски јазик и одлично се разбираме“, рече министерката.

Петрова-Чамова истакна дека Бугарија испратила доволно јасни сигнали.

„Покажавме целосна подготвеност да обезбедиме предвидливост и јасни критериуми за она што треба да биде направено. Се надевам дека од другата страна ќе се премине кон спроведување на договореното, а не кон обиди за избегнување одговорност“, изјави таа.

Министерката за надворешни работи нагласи дека Софија не поставува нови барања надвор од договореното на европско ниво.

„Постои одлука на Народното собрание од 2025 година дека Бугарија бара единствено да се применува европскиот консензус од 2022 година. Не знам каков посилен сигнал може да биде даден. Тоа е единственото што го бараме“, рече Петрова-Чамова.

Таа изрази надеж дека политичкото раководство во Скопје ќе ги насочи своите напори кон создавање општествена и политичка клима за исполнување на обврските, бидејќи тоа е „најдобрата европска перспектива и најдобриот пат за граѓаните на Северна Македонија“.