Бугарскиот амбасадор во Косово му врачи признание на ректорот на Универзитетот во Приштина

Бугарскиот амбасадор во Косово, Христо Краевски, му врачи почесна грамота на ректорот на Универзитетот во Приштина, проф. Арбен Хајрулаху, како признание од бугарското Министерство за образование и наука за придонесот во отворањето на лекторат по бугарски јазик и промоцијата на бугарскиот јазик и култура во Косово, јавува БТА.

Лекторатот по бугарски јазик на Универзитетот „Хасан Приштина“ беше официјално отворен во октомври 2025 година и успешно функционира веќе втор семестар. Во моментов, седум студенти изучуваат бугарски јазик.

На средбата беа разгледани можностите за продлабочување на соработката меѓу Универзитетот во Приштина и бугарските високообразовни институции, со посебен акцент на зајакнувањето на врските меѓу младите научници од двете земји.

Амбасадорот Краевски ја претстави и програмата „Денови на бугарскиот јазик, култура и наука во Косово 2026“, во рамки на која во септември во Приштина ќе бидат организирани изложба за достигнувањата на бугарската наука на Антарктикот и предавање на проф. д-р Христо Пимпирев.

Краевски и Хајрулаху се согласија дека јазиците и универзитетите имаат клучна улога во поврзувањето, поттикнувањето на меѓусебното разбирање и зближувањето меѓу луѓето. Универзитетот во Приштина веќе соработува со бугарски универзитети преку програмите „Еразмус+“ и „Хоризонт“.