(Видео) Димитриевски: Кризата со откупот на млеко се зголемува, Мицкоски нема пари за земјоделците

„Додека Мицкоски го штити Трипуновски, сточарите се во тешка криза“ – ова денеска на прес-конференција го изјави Александар Димитриевски од Комисијата за земјоделство на СДСМ.

Според опозициската партија, македонското сточарство буквално се распаѓа поради намалениот откуп и понижувачките ниски откупни цени кои изнесуваат едвај дваесетина денари за литар млеко.

Димитриевски вели дека наспроти ниските откупни цени за производителите, цените на млекото и млечните производи во маркетите растат.

„Некој прави огромни профити врз грбот на земјоделците. Кризата дополнително се продлабочува. Две млекарници во делчевскиот регион најавија прекин на откупот, што значи дека многу сточари остануваат без пласман и без егзистенција“, истакна Димитриевски.

Од СДСМ реагираат дека дополнителен удар врз секторот е доцнењето на субвенциите за добиток и премиите за млеко.

„Затоа прашуваме: каде се парите за земјоделците? Дали во Буџетот веќе ги нема? СДСМ бара итна интервенција за обезбедување непречен откуп на млекото и посебна мерка за поддршка на производителите на кравјо млеко преку интервентната програма. Ова што се случува е недозволиво! Мицкоски го уништи земјоделството. Субвенциите се намалени за 40 милиони евра, откупот е намален за 46 проценти, а земјоделците се оставени без заштита и без перспектива“, кажа Димитриевски.

Според него, хаосот е насекаде – кај сточарите, градинарите, оризопроизводителите, овоштарите и пчеларите.

„Сите се соочуваат со исти проблеми: ниски откупни цени, неисплатени субвенции и несигурен пласман. Го прашуваме Мицкоски зошто нема мерки за млекото, оризот, доматот и пиперката? Зошто доцнат субвенциите? Затоа што, како што рековме нема пари во буџетот за земјоделците заради криминални тендери. Сега снемува пари и за тендери штом му се брза со избори“, рече тој.