Радев во Гдањск: Бугарија го поддржува долгорочното обновување на Украина

Меѓународната заедница треба да ги мобилизира напорите и средствата за прекин на војната во Украина, со што би се отворил патот за нејзино долгорочно обновување, изјави бугарскиот премиер Румен Радев на Меѓународната конференција за обнова на Украина во Гдањск, јавува БГНЕС.

Во своето обраќање Радев потсети дека војната трае повеќе од четири години и дека на 11 јуни ја надминала должината на Првата светска војна. „Оваа војна на исцрпување, уништување и опустошување мора да заврши“, нагласи тој, повикувајќи на одржливо мировно решение врз основа на Повелбата на ОН и меѓународното право.

Радев истакна дека обновата на Украина не е само економски процес, туку прашање од значење за стабилноста, безбедноста и конкурентноста на цела Европа. Тој посочи дека Бугарија е подготвена долгорочно да го поддржи овој процес.

Како клучни области за соработка ги наведе енергетската диверзификација, поврзаноста во Црноморскиот регион и безбедносната соработка. Според него, Вертикалниот гасен коридор, Трансбалканскиот гасовод, Транспортниот коридор 8 и мултимодалниот коридор меѓу Грција, Бугарија и Романија можат да придонесат за енергетската сигурност и економското закрепнување на Украина.

Радев ја истакна и важноста на заедничкиот бугарско-романски Центар за морска безбедност во Црното Море, како и амбицијата на Украина за членство во ЕУ, која, според него, треба да биде двигател на реформи, модернизација и подобра инвестициска средина.

Тој потсети дека Бугарија е земјата членка на ЕУ со најголемо национално малцинство во Украина, со дијаспора од над 250.000 луѓе. „Бугарија е подготвена активно да работи и е цврсто посветена на овој процес“, изјави Радев.