Министерството за здравство на Бугарија доделува 240 нови стипендии за специјализација во дефицитарни медицински области

Министерството за здравство на Бугарија доделува 240 нови стипендии за специјализација во дефицитарни медицински области, соопштија од прес-центарот на Министерството за здравство на Бугарија. Поддршката е дел од проектот „Поттикнување на специјализацијата по специјалности и во области со недостиг на специјалисти“ и е наменета за млади лекари, медицински сестри и акушерки.

Од вкупниот број стипендии, 165 се за лекари кои специјализираат и работат во области со најниска обезбеденост со медицински кадар, а 75 се за специјализанти по специјалности со докажан недостиг на национално ниво.

Кандидатите можат да поднесуваат пријави од 1 јули 2026 година до 28 февруари 2027 година. Одобрените специјализанти месечно ќе добиваат финансиска поддршка во износ од две и пол минимални плати, дополнително на основниот надоместок.

Најголем недостиг на лекари има во детска психијатрија, детска хирургија, епидемиологија на заразни болести и клиничка вирусологија. Недостиг од медицински сестри и акушерки се бележи во педијатриската и психијатриската здравствена нега, како и во итната медицинска помош.