Ле Риголер: Компромисот од 2022 година нема повторно да се отвори и нема да се преговара одново

Компромисот од 2022 година, како и обврските што произлегуваат од него во однос на преговарачкиот процес, е едно од клучните прашања за европскиот пат на Северна Македонија, вели во интервју за порталот Порталб.мк амбасадорот на Франција во Скопје, Кристоф Ле Риголер, пренесува БТА.

„Малку семантика, за да бидеме точни — компромисот од 2022 година не е компромис со Бугарија, туку текст потпишан меѓу Северна Македонија и Европската Унија. И со тој текст Северна Македонија презема обврски кон Европската Унија“, изјави францускиот амбасадор, кој е категоричен дека документот „нема повторно да биде отворен“, независно од различните политички изјави во Северна Македонија.

„Мислам дека треба да бидеме реалисти, компромисот од 2022 година нема повторно да биде отворен и нема да се преговара одново. Повторното преговарање за овој компромис од 2022 година би нè довело само до еден резултат — сите губиме време. Не мислам дека тоа е добра идеја“, вели Ле Риголер.

Според него, патот напред не е повторно преговарање, туку наоѓање начин за спроведување на компромисот на „политички прифатлив начин и во разумен рок“, нагласувајќи дека за тоа е потребен „искрен, отворен и смирен дијалог меѓу Скопје и Софија“.

„Најверојатно ќе има провокации, непромислени изјави, обвинувања итн. Затоа сите ние треба да бидеме разумни во однос на тоа, да го управуваме процесот мирно и зрело, за македонските, бугарските, но и европските политичари да бидат подготвени искрено да се ангажираат во него и да влезат во веродостоен дијалог“, рече Ле Риголер.

Тој прецизираше дека дезинформациите се уште едно искушение, кое при блокиран пат кон ЕУ остава простор за структури што можат да ја злоупотребат граѓанската разочараност преку манипулативни кампањи.

Франција ќе продолжи да поддржува иницијативи за медиумска писменост, независно истражувачко новинарство и борба против манипулирањето со информациите во Северна Македонија, рече францускиот амбасадор.

Во однос на француско-германскиот предлог за постепена интеграција на земјите кандидатки во Европската Унија Ле Риголер вели дека истиот не подразбира создавање меѓустатус или „втора лига“ за земјите од Западен Балкан. Напротив, според него, целта на Франција и Германија е процесот на проширување да добие нова динамика и земјите кандидатки, вклучително и Македонија, да имаат поголеми придобивки на патот кон полноправно членство.

„Оваа иницијатива, француско-германскиот нон-пејпер на кој се повикувате, има неколку значења. Првото значење е важно затоа што покажува дека Франција и Германија се мобилизираат и веруваат во проширувањето. Идејата е токму да му се даде нова динамика и нов елан на овој процес на проширување, за кој гледаме дека во некои држави е комплициран, односно ќе бара повеќе време отколку што се очекуваше“, рече Ле Риголер.

Тој нагласува дека постепената интеграција не треба да се гледа како замена за членството, туку како начин реформите подобро да се поврзат со конкретните придобивки што земјите кандидатки можат да ги имаат пред полноправното влегување во ЕУ.

„Работејќи на овој процес на постепена интеграција, се стимулираат реформите, но истовремено реформската работа подобро се поврзува со придобивките од патот кон ЕУ. Идејата е да се спроведуваат и да се поддржуваат политиките што државите ги преземаат за реформите, како и да им се помогне на земјите да напредуваат и да го забрзаат темпото на реформите“, изјави францускиот амбасадор.

Ле Риголер појаснува дека овој документ не подразбира создавање втор статус за земјите што се стремат кон членство во ЕУ.

„Овој нон-пејпер не подразбира дека ќе се создаде втор статус, односно дека ќе има земји членки на ЕУ што нема да станат членки со полни права, туку ќе имаат само меѓустатус. Тоа не е планот, бидејќи визијата што ја имаме во Париз и Берлин е јасна, а тоа е целосна интеграција на земјите од Западен Балкан и на Македонија“, рече тој.

Запрашан дали тоа значи дека нема да има „втора лига“, амбасадорот одговори категорично дека тоа не е целта на предлогот.

„Не, тоа воопшто не е втора лига и не сакаме да создадеме таква поделба или втора лига, туку сите треба да бидеме обединети во истата лига, работејќи заедно според истите правила, вредности и цели за европски суверенитет, безбедност и просперитет за нашето население“, рече Ле Риголер.

Во однос на реформите што земјата треба да ги направи, треба да се работи внимателно, особено во областа на владеењето на правото, борбата против корупцијата и независноста на судскиот систем, при што Франција обезбедила експерти кои работат во трите клучни министерства за спроведување на неопходните реформи.

„Добро е да се усвојуваат закони, но уште подобро е тие да се спроведуваат. Тоа е нешто на што обрнуваме внимание и е демократска неопходност, а граѓаните на оваа држава исто така ќе треба да оценат дали реформите биле спроведени“, посочи Льо Риголер, цитиран и од порталот Мета.мк.