Бугарскиот институт INSAIT се наоѓа меѓу европските лидери во вештачката интелигенција
Институтот за компјутерски науки, вештачка интелигенција и технологии (INSAIT) во рамките на Софискиот универзитет постигна значајни меѓународни успеси само четири години по основањето, пишува во опширен материал БГНЕС.
INSAIT е прв во Источна Европа и меѓу четирите водечки институции во Европската Унија според бројот на трудови прифатени на престижната конференција за компјутерска визија и вештачка интелигенција CVPR 2026. Институтот има вкупно 20 прифатени трудови, од кои еден е избран за усна презентација — признание што го добиваат само 3,5 проценти од прифатените истражувања.
Трудовите опфаќаат области како роботика, просторно расудување, набљудување на Земјата, визуелни агенти и машинска перцепција. Со резултатот INSAIT се најде пред универзитети како Кембриџ, Принстон и Јејл, како и пред многу високообразовни институции од повеќе европски земји.
На 23 јуни 2026 година истражувачот на INSAIT, д-р Бернхард Хојплер, го освои првиот ERC грант за бугарска институција во инженерските и природните науки. Грантот изнесува 2,5 милиони евра и следува по 171 неуспешни кандидатури од бугарски институции во овие области во изминатите речиси две децении.
Проектот на Хојплер предвидува развој на алгоритми за управување сложени системи во реално време, со примена во транспортните мрежи, железничкиот сообраќај, синџирите на снабдување и интернетот.
Научниот директор на INSAIT, проф. Мартин Вечев, изјави дека ERC наградите се мерило за нивото на науката, иновациите, технологијата и човечкиот потенцијал на една држава. Според него, уште при основањето на институтот многумина се прашувале дали Бугарија може да освои ваков грант, „а сега тоа веќе е факт“.
Во претходните години INSAIT објави стотици трудови на водечки научни конференции, го разви бугарскиот јазичен модел BgGPT, влезе меѓу 100-те најдобри светски институции според CSRankings и учествуваше во проектот за изградба на бугарска фабрика за вештачка интелигенција вредна 90 милиони евра.
