Одбележувањето на 205-годишнината од основањето на Болград во Украина денеска почна со молебен во катедралата „Свето Преображение Господово“

Одбележувањето 205 години од основањето на Болград, Украина, денеска почна со молебен во катедралниот храм „Свето Преображение Господово“, на чиј крај беше прогласена воздушна тревога во градот и во регионот, јавува БТА.

Богослужбата за напредок на Болград и за здравјето на неговите жители ја предводеше протојерејот Стефан Турлак. На молебенот присуствуваше и бугарска делегација, во која беа пратеничката Росица Кирова, амбасадорот на Бугарија во Украина Златин Крстев, генералниот конзул во Одеса Светослав Иванов и генералниот директор на БТА Кирил В’лчев.

„Нека Бог им помага на сите бесарабски Бугари, на целиот бугарски народ и на нашата украинска држава и нека им даде сила на нашите војници“, порача отец Стефан.

Болград е основан во 1821 година од бугарски доселеници и се смета за неофицијална престолнина на бесарабските Бугари. Градот е административен центар на Болградскиот Округ во Одеската Област, каде што повеќе од 60 отсто од населението е бугарско.