Бугарија подготвува информативен портал за иселениците кои планираат да се вратат во земјата

Извршната агенција за Бугарите во странство планира до крајот на годината да пушти интернет-портал со практични информации за бугарските граѓани кои размислуваат да се вратат во земјата, изјави директорката на Агенцијата, Рајна Манџукова, пред парламентарната Комисија за политики за Бугарите надвор од земјата, јавува БТА.

Порталот се развива во рамките на проектот „Ја избирам Бугарија“ и ќе содржи информации за потребните документи, запишување деца во училишта и градинки, статус на сопружници со странско државјанство, признавање работен стаж, здравствено осигурување и медицинска документација.

„Ова е мој долгогодишен сон како Бугарка од странство – портал на кој секој што решил или размислува да се врати ќе може да најде одговор на сите прашања што го интересираат“, рече Манџукова.

Програмската основа на порталот е веќе подготвена. Во анкета со повеќе од 700 испитаници, 19 отсто изјавиле дека планираат да се населат во Бугарија, а 37 отсто сериозно ја разгледуваат таа можност. Собрани се 430 прашања, за кои одговори ќе се бараат од надлежните институции.

До крајот на октомври се планира порталот да биде даден на тестирање на фокус-група, а слободниот пристап да биде овозможен до крајот на годината. Јавното претставување е предвидено за средината на јануари, доколку техничките тестирања бидат успешни.

Во рамките на проектот е изработена и долгорочна стратегија за враќање на Бугарите од странство, која треба да биде доставена до Министерството за труд и социјална политика.

Агенцијата, според Манџукова, одржува активни контакти со повеќе од 1.000 бугарски организации во 52 држави.