Бугарската заедница во романското село Извоареле ги претстави своите традиции, историја и јазик во музејот „Етар“ во Габрово

Претставници на бугарската заедница од селото Извоареле во Романија зедоа учество во Празникот на пестилот во Регионалниот етнографски музеј на отворено „Етар“ во Габрово, јавува БТА.

На деветтото издание на манифестацијата, која првпат има меѓународно учество, групата од Извоареле се претстави со традиционална храна и автентични народни носии. Селото е основано од Бугари пред повеќе од 200 години.

„Дома го зборуваме нашиот стар говор. За нас е многу важно да го зачуваме, бидејќи е дел од нашата меморија, но покрај него го користиме и го чуваме и литературниот бугарски јазик“, изјави Бијанка Василе од Извоареле. Според истражувањата на лингвистот Максим Младенов од Бугарската академија на науките, локалниот дијалект му припаѓа на никополскиот говор.

Гостите од Романија претставуваат домашни мармалади и компоти, ракија и вишновка, како и стари фотографии и традиционална облека, меѓу кои и најстариот зачуван автентичен бугарски сукман во Извоареле. „Се трудиме да зачуваме сè што останало од нашите предци“, истакна Василе.

Во Извоареле се зачувани и обичаи поврзани со Бабинден, Лазаровден, Трифон Зарезан, Божик и Нова година. Во селото денес живеат околу 60 деца, кои посетуваат неделно училиште финансирано од Бугарија, каде што учат на бугарски литературен јазик.