Економскиот универзитет во Варна прими околу 40 меѓународни студенти преку „Еразмус+“

Економскиот универзитет во Варна во зимскиот семестар од академската 2026/2027 година прими околу 40 меѓународни студенти во рамките на програмата „Еразмус+“, соопшти универзитетот.

Студентите доаѓаат од осум држави – Шпанија, Италија, Португалија, Германија, Полска, Словенија, Турција и Словачка.

Универзитетот годинава бележи и рекорден број студенти кои избрале мобилност во текот на целата академска година. Вкупно 10 меѓународни студенти ќе се школуваат во Варна во двата семестра.

Од универзитетот оценуваат дека тоа е „уште една потврда за меѓународниот авторитет и привлечноста на универзитетот како претпочитана дестинација за академска мобилност“.

За полесна адаптација на новопристигнатите студенти, Одделот за меѓународна соработка на 14 и 15 септември организираше традиционални воведни денови.

Дводневната програма опфати информативни сесии, обиколки на универзитетскиот кампус и средби насочени кон воспоставување нови пријателства и меѓународни контакти.

Преку интерактивни игри, неформални активности и практични совети, студентите имаа можност да се запознаат меѓусебно и да добијат повеќе информации за животот во Варна и во Бугарија.

Од Економскиот универзитет во Варна наведуваат дека со секоја академска година настојуваат да ја зацврстат својата позиција како дестинација за меѓународна мобилност, овозможувајќи им на студентите да студираат во мултикултурна средина, да разменуваат идеи и искуства и да создаваат меѓународни контакти.