Бугарскиот министер за економија Александар Пулев и германската амбасадорка во Софија Ирене Планк разговараа за нови инвестиции и индустриски проекти

Вицепремиерот и министер за економија, инвестиции и индустрија Александар Пулев се сретна со германската амбасадорка Ирене Планк, со која разговараше за продлабочување на економската соработка, нови инвестиции, автомобилската индустрија и стратешки проекти во одбранбениот сектор, соопшти Министерството.

Пулев оцени дека Германија е водечки трговски и инвестициски партнер на Бугарија и посочи дека германските компании во изминатата деценија значително придонеле за развојот на автомобилскиот сектор во земјата. Според него, секторот учествува со околу 10 отсто во БДП и вработува повеќе од 90.000 лица.

Тој нагласи дека Бугарија има индустриска и инженерска база, но треба да привлекува нови технологии и производства, особено во електромобилноста и високотехнолошките компоненти.

На средбата биле разгледани и можностите за проширување на индустриските зони и обезбедување инфраструктура за нови инвестиции. Како пример била посочена Тракиската економска зона, каде што има интерес за проширување на производството, вклучително и од германски инвеститори.

Разговорите опфатиле и стратешко партнерство со германската одбранбена компанија „Рајнметал“. Пулев изјавил дека бугарската влада е силно посветена на реализацијата на проектот, како и на развојот на инвестиции во дронови, беспилотни системи, логистички возила и друга опрема.

Разговорите со германските партнери ќе продолжат на експертско и политичко ниво, вклучително и за време на претстојната посета на Пулев на Берлин.