Бугарија и ЕБОР потпишаа меморандум за развој на јавно-приватните партнерства
Вицепремиерот и министер за економија, инвестиции и индустрија на Бугарија, Александар Пулев, и потпретседателот на Европската банка за обнова и развој (ЕБОР), Марк Боуман, потпишаа Меморандум за разбирање, насочен кон создавање механизам за подготовка на јавно-приватни партнерства.
„ЕБОР е златниот стандард во меѓународното финансирање и во областа на развојните банки. Нашата цел е јавно-приватните партнерства да станат инструмент за модернизација на инфраструктурата и за мобилизирање дополнителни приватни средства“, истакна Пулев.
Меморандумот е следен конкретен чекор во проширувањето на стратешкото партнерство меѓу Бугарија и ЕБОР. Тој ќе има клучна улога во подготовката и структурирањето проекти што можат да привлечат приватен капитал и да ја забрзаат модернизацијата на стратешката инфраструктура во земјата.
ЕБОР ќе го поддржува структурирањето на проектите така што ќе можат да комбинираат приватно финансирање со средства од Европската Унија. Меѓу предвидените активности се подготовка на претпроектни студии и анализи на изводливост, структурирање на ризикот и подготовка на проектите за реализација.
„Сакаме да имаме активна улога во модернизацијата на инфраструктурата во земјата преку јавно-приватни партнерства. Веруваме дека тоа е патот напред“, изјави вицепремиерот. Тој додаде дека новиот механизам ќе овозможи подготовка на приоритетни проекти во стратешки области како што се енергетиката, индустриските зони, транспортната и друга клучна инфраструктура.
Како пример за проект со потенцијал за развој преку ваков пристап, Пулев ја посочи Индустриската зона „Доброславци“. „Ова е пример како преку правилно структурирање, комбинирање јавни средства и приватен капитал и привлекување стратешки инвеститори можеме да создадеме нови можности за високотехнолошката индустрија и за развојот на регионот“, изјави Пулев.
„Веќе идентификувавме неколку многу перспективни индустриски зони на кои им е потребно проширување на капацитетите“, истакна тој, додавајќи дека се разгледуваат можности и различни механизми за поддршка и неповратно финансирање од европски средства што можат да се искористат за поддршка на овој процес.
Вицепремиерот посочи дека е изготвена и нова законодавна рамка за јавно-приватните партнерства, која во моментов минува низ завршната фаза на јавните консултации. „Целта е да се создаде конкурентна, предвидлива и урамнотежена средина за реализација на јавно-приватни проекти, која истовремено ќе го заштитува јавниот интерес и ќе создава услови за мобилизирање приватен капитал. Законодавната рамка е клучен елемент од целокупниот пристап на владата за забрзување на инвестициите и модернизација на инфраструктурата преку јавно-приватни партнерства“, додаде вицепремиерот.
Од своја страна, потпретседателот на ЕБОР, Марк Боуман, ги оцени јавно-приватните партнерства како ефикасен модел за привлекување приватен капитал во инфраструктурни проекти. Тој нагласи дека централизираниот пристап е од особено значење за успешната реализација на поголем број проекти. „Веруваме дека ова е одличен начин да ги привлечеме толку потребните приватни инвестиции во инфраструктурата тука, во Бугарија“, истакна тој.
