Документарен филм за основањето на Американскиот универзитет во Бугарија ќе биде прикажан денес во Генералниот конзулат на Бугарија во Њујорк

Документарниот филм „The Birth of Change“, посветен на основањето на Американскиот универзитет во Бугарија (АУБ), ќе биде прикажан денес, 30 септември, во Генералниот конзулат на Бугарија во Њујорк, САД. Проекцијата ќе започне во 19:00 часот по локално време, соопштија од дипломатското претставништво на својата страница на Фејсбук, пренесува БТА.

По проекцијата ќе се одржи разговор со Георги Илиев за создавањето на филмот и за луѓето што учествувале во остварувањето на идејата за универзитетот.

Влезот е слободен, а потребна е претходна потврда за присуство.

Филмот раскажува за основањето на АУБ во контекст на транзицијата на Бугарија кон демократија и го проследува бугарско-американското партнерство што довело до основањето на универзитетот. Во приказната се претставени културните разлики, различните интереси и пречките што го придружувале остварувањето на идејата.

Режисер на „The Birth of Change“ е Кирил Ценов, а сценарист и продуцент е Георги Илиев. Филмот веќе го доби своето прво меѓународно признание – наградата за најдобар меѓународен документарен филм (Best International Documentary Film) на Austin International Art Festival.

АУБ е основан пред 35 години и поврзува студенти, професори и партнери од Бугарија, САД и други земји. Генералниот конзулат на Бугарија во Њујорк е домаќин на годишните средби на дипломираните студенти на универзитетот.