Со учество на Бугарија постигнат договор за распределбата на придонесите за ЕСМА
Советот за економски и финансиски прашања на ЕУ (ЕКОФИН) постигна компромис за распределбата на придонесите за Европскиот орган за хартии од вредност и пазари (ЕСМА), соопшти бугарското Министерство за финансии. Според Министерството, договорот е постигнат со активно учество на Бугарија и значително го намалува финансискиот товар врз националните органи.
Бугарскиот министер за финансии Г’лаб Донев, кој учествуваше на седницата, му се заблагодари на ирското претседателство за вложените напори и за земањето предвид на бугарската позиција за Пакетот за пазарна интеграција и надзор. Пакетот е дел од Унијата на заштеди и инвестиции на ЕУ.
На седницата беше разгледан и извештајот на Европската комисија за конкурентноста на банкарскиот сектор. Донев нагласи дека нејзиното зголемување бара сеопфатен пристап, кој ги зема предвид регулаторните, технолошките, економските и пазарните фактори.
Тој ја истакна потребата од ефикасна примена на инструментите за реструктурирање на банкарските групи. Според соопштението, Бугарија ја нагласува и важната улога на ликвидноста при реструктурирањето, во рамките на управувањето со банкарски кризи.
На состанокот на Еврогрупата на 8 октомври, министрите разговараа за меѓународните средби, најновите економски движења, напредокот на Унијата на заштеди и инвестиции, ефикасноста на јавните финансии и влијанието на енергетските пазари врз еврозоната.
