Околу 8.000 учесници во вежбата на НАТО „Steadfast Duel 2026“

Околу 8.000 офицери, војници и цивили од Европа и Северна Америка учествуваат во командно-штабната вежба „Steadfast Duel 2026“, која ја проверува подготвеноста на НАТО за конфликт со висок интензитет, објави „Бугарски воен журнал“ на својата фејсбук-страница.

Вежбата е осмислена од Врховниот штаб на сојузничките сили во Европа (SHAPE), а ја раководи Здружениот воен центар на НАТО. Во објавата таа е опишана како „најголемата вежба на НАТО за колективна одбрана според членот 5, на оперативно и на повисоко тактичко ниво“.

Компјутерски поддржаната вежба ја тестира подготвеноста на Алијансата за дејствување во сите оперативни средини. Таа служи и за испитување на операции што поврзуваат повеќе воени домени, како и на динамиката на ескалација на конфликтите.

Според „Бугарски воен журнал“, во вежбата се користат и современи модели и симулации засновани на вештачка интелигенција, со цел условите да бидат што поблиски до реалните оперативни ситуации.