35-та бугарска антарктичка експедиција: 18 национални и шест меѓународни научни проекти

Бугарскиот антарктички институт (БАИ), Националниот центар за поларни истражувања (НЦПИ) и „Кауфланд Бугарија“ утре во Софија ќе одржат официјална прес-конференција по повод почетокот на 35. бугарска антарктичка експедиција. Настанот ќе се одржи на сцената „Централни хали“, јавува БТА.

Раководителот на експедицијата, проф. д-р Христо Пимпирев, и логистичкиот тим ќе ги претстават актуелните научни проекти, распоредот на пловењето на научноистражувачкиот брод „Св. св. Кирил и Методиј“ (НИК 421), како и предизвиците со кои ќе се соочат бугарските поларни истражувачи во новата сезона на Антарктикот.

Во рамките на 35. експедиција, главното внимание ќе биде насочено кон реализацијата на 18 научни проекти на бугарски тимови и шест меѓународни проекти.

Во експедицијата годинава учествуваат и истражувачи од Бразил, Еквадор, Германија, Грција, Колумбија, Кина, Обединетите Арапски Емирати, Португалија, Романија, САД и Уругвај.

На 4 ноември научноистражувачкиот брод „Св. св. Кирил и Методиј“ (НИК 421) ќе исплови од поморската станица во Варна на својата петта мисија до островот Ливингстон на Антарктикот.

Како долгогодишен партнер на бугарските научници, „Кауфланд Бугарија“ на прес-конференцијата ќе претстави детали за обемната логистичка поддршка и снабдувањето со храна што компанијата ги обезбедува за годинашната мисија на островот Ливингстон.

Пимпирев на 20 октомври изјави дека Бугарија е центар на поларните истражувања во регионот и дека во ноември во земјата ќе се одржи првата балканска научна конференција од оваа област.

Истиот ден, на церемонија во претседателската палата, Пимпирев го прими националното знаме за 35. бугарска антарктичка експедиција од претседателката Илијана Јотова.