Документарниот филм „Раскажувачот“ посветен на Димитар Талев ќе биде прикажан денеска во Софија

Документарниот филм „Раскажувачот“, посветен на животот и творештвото на бугарскиот писател и новинар Димитар Талев, ќе биде прикажан денеска, 30 октомври, од 16:30 часот во Библиотечно-информативниот центар на Извршната агенција за Бугарите во странство во Софија, соопшти Агенцијата, пренесува БТА.

Филмот е создаден по идеја на Теодора Милева, бугарска авторка и режисерка која живее во Виена, Австрија, по повод 60-годишнината од смртта на писателот.

Остварувањето го следи животниот пат на Талев – од детството и младоста во Прилеп, преку годините на војни и политички превирања, до прогоните, логорите и интернирањето по 1944 година, како и подоцнежното признание на неговото книжевно творештво.

Според Агенцијата, преку спојување документарни факти, експертски анализи и уметнички реконструкции снимени во родниот крај на писателот, „Раскажувачот“ ја прикажува поврзаноста меѓу личната судбина на Димитар Талев, историските превирања на Балканот и неговото книжевно наследство.

Теодора Милева е авторка, режисерка и снимателка на филмот. Таа работи во областа на литературата, филмот и новинарството, промовирајќи ја бугарската култура и поттикнувајќи ги врските меѓу творците и културните заедници од Бугарија и од странство.

Милева е основачка на културно-образовната иницијатива ArtPath – подкаст насочен кон претставување на бугарската уметност и култура надвор од земјата. Како дел од раководството на Бугарската културно-просветна организација „Кирил и Методиј“ во Виена, таа учествува и во подготовката на различни културни настани и иницијативи.

Во текот на оваа година Милева беше номинирана за признанието „Бугарка на годината – Св. Злата Мегленска 2025“. На церемонијата на доделувањето таа доби плакета за активниот ангажман во културни и социјални иницијативи на бугарската заедница во Австрија.