ЦИК на Бугарија: Излезноста во вториот круг од претседателските избори до 16 часот е 19,33 отсто

Излезноста во вториот круг од претседателските избори во Бугарија до 16 часот изнесува 19,33 отсто, а гласале 1.282.848 избирачи, соопшти портпаролката на Централната изборна комисија (ЦИК), Стојанка Балова-Цветкова, на брифинг, пренесува БГНЕС.

Највисока излезност е регистрирана во 23. изборна единица во Софија – 29,21 отсто, а најниска во Крџали – 9,84 отсто. Во првиот круг, до истиот час, излезноста изнесувала 15,95 отсто, односно за речиси 3,5 процентни поени помалку.

ЦИК добила и информација од Реонската изборна комисија во Шумен дека во чантата на претседател на избирачки одбор биле пронајдени контролни потврди од машинското гласање. Случајот се проверува, а на местото се очекува да пристигнат претставници на полицијата и обвинителството.

„Немаме информации како биле изнесени. Тоа можат да го утврдат истражните органи и обвинителството“, изјави Балова-Цветкова.

Таа појасни дека контролните потврди служат за контролно пребројување, додека официјалниот резултат од машинското гласање се добива од извештајот што машината го генерира на крајот од изборниот ден.

До 16 часот биле запрени машини за гласање во 21 избирачко место во земјата. Во 13 од нив се преминало на гласање со хартиени ливчиња, додека во останатите осум гласањето продолжило на втората машина, бидејќи тие места биле опремени со по два уреда.

Во ЦИК досега пристигнале 56 пријави, од кои најголемиот дел се однесуваат на изборна агитација и објавување резултати од анкети на јавното мислење на денот на изборите.