|

Бугарија ги издвои стратешкото поврзување и конкурентноста на ЕУ како приоритети

Бугарија ги издвои стратешкото поврзување и конкурентноста на ЕУ како приоритети на седницата на Советот за општи работи во Брисел. Бугарската заменик-министерка за надворешни работи Иванка Ташева ја нагласи потребата од мерки за справување со високите цени на енергијата и од поддршка за индустриите што трошат многу енергија, соопшти бугарското Министерство за надворешни работи.

Ташева го истакна геополитичкото значење на стратешкото поврзување. Во 2027 година Бугарија и Европската комисија заеднички ќе организираат регионален самит за поврзување. Меѓу бугарските приоритети се и преговорите за долгорочниот буџет на ЕУ, одбраната и безбедноста во црноморскиот регион, како и проширувањето на Унијата според заслугите на секоја земја кандидат.

Бугарија е меѓу коавторите на заедничкиот документ претставен на седницата, со кој се бара нуклеарната енергија и обновливите извори на енергија да имаат еднаков пристап до средства од буџетот на ЕУ во следниот програмски период.

„Бугарија го поддржува спроведувањето на Стратегијата преку пристап што ги обединува напорите на националните власти, приватниот сектор и граѓаните“, изјави Ташева во расправата за новата Стратегија на ЕУ за подготвеност. Таа ги издвои заштитата на критичната инфраструктура, подобрувањето на способноста за одговор при кризи и раното препознавање на ризиците.

Министрите разговараа и за работната програма на Европската комисија за 2027 година. При одделното претставување на програмата пред бугарските пратеници, Албена Аминкова, раководителка на политичкиот тим на Претставништвото на ЕК во Бугарија, изјави дека новата повеќегодишна финансиска рамка предвидува петкратно зголемување на буџетот за одбрана и дека Бугарија располага со 3,3 милијарди евра во рамките на програмата СЕЈФ.

Слични Објави