Арбен Фетаи поднесе оставка: вицепремиерот за добро владеење вели дека заминува со крената глава и чиста совест

Вицепремерот за добро владеење Арбен Фетаи преку социјалните мрежи соопшти дека на премиерот Христијан Мицкоски му ја доставил неговата оставка од функцијата.

Фетаи објави дека одлуката била донесена внимателно и произлегува од неговото убедување дека во актуелните околности тоа е најправилен и најдостоинствен чекор.

„Драги пријатели и сограѓани,
Денес ја поднесов мојата оставка од функцијата вицепремиер задолжен за добро управување до премиерот.
Во текот на овие две години, имав чест и привилегија да ѝ служам на земјата, придонесувајќи за реформи насочени кон зајакнување на одговорноста, транспарентноста и владеењето на правото, мисија подеднакво важна колку што е и неблагодарна.
Дали сум целосно задоволен од она што го постигнавме? Секако дека не. Секогаш има простор за повеќе, за подобро и за побрзо. Но, дали работев со максимална посветеност за да воспоставам цврсти темели врз кои ќе се гради понатаму? Без никакво двоумење, да.
Заминувам со крената глава и чиста совест“.

Ова, додава Фетаи во напишаното, била добро осмислена одлука.

„Донесена со убедување дека во сегашните околности ова е најправедното и најдостоинственото нешто што треба да се направи.
Им се заблагодарувам на сите оние што ми веруваа, ме поддржаа и соработуваа со мене за време на ова патување. Посебна благодарност до мојот тим, меѓународните партнери, граѓанското општество и граѓаните кои ми дадоа сила и мотивација на секој чекор.
Служењето на јавниот интерес не завршува кога ќе заврши функцијата. Напротив, тоа продолжува секаде каде што се потребни интегритет, храброст и слободни гласови во одбрана на општото добро“, пишува Фетаи.