| |

АРСОВСКИ: БОЧВАРСКИ ТУЖИ МЕ И НА СУД КАЖИ ДАЛИ ТВОЕТО СЕМЕЈСТВО ЗЕДЕ МИЛИОНСКИ ТЕНДЕР

После молкот на надлежните институции за скандалот во кој што Општина Штип доделува милионски тендер на семејната фирма на Бочварски може да се каже дека борбата против корупцијата во Македонија практично и не постои. Џабе министер за борба против корупција, џабе декларативни изјави, џабе флоскули, вели на прес конференција Димче Арсовски.

– Надлежните институции сакаат да го забошотат и прикријат случајот, кој е школски пример за корупција и злоупотреба на службена должност. Очигледно само власта не сака тоа да го види. Ова е пример како Зоран Заев работеше во Струмица додека беше градоначалник, истото тоа го пресликал Бочварски во Штип. Јавно ја повикувам Антикорупциската комисија да го истражи овој случај. Доста молчи, доволно е. Тие антикорупционери кои што седат во фотелји во институцијата, не се само таму за да седат на државен трошок и претседателката на Антикорупциската комисија не е таму за да биде платена од народните пари за да ги штити СДСМ и Владата, туку треба да иницираат случаи и да работат. Еве им јавно повик да отворат случаи и да истражат дали имало било каков судир на интереси. До сега ниту еден случај немаат завршено како што треба до крај. Затоа евидентно е дека ги штитат Владата и СДСМ – вели Арсовски.

Според Арсовски, Општина Штип доделува милионски тендер на фирмата „Де Лукс“ ДОО од Штип во сопственост на Владимир и Венцислав Бочварски, чичко и татко на Благој Бочварски само еден ден откако овој истиот е именуван од градоначалник за министер за транспорт и врски.

– Целата тендерска постапка се одвивала додека Благој Бочварски е градоначалник на Штип, а еден ден откако е именуван за министер, на 1-ви септември, се објавува неговата семејна фирма како добитник на тендерот. Мислам дека нема потреба ниту да се убедуваат, ниту да се обидуваат да убедат некого дека ова е чиста случајност или чиста професионалност. Не почитувани, ова е класична злоупотреба на службена должност. Тоа значи дека Бочварски знаел, па дури и имал најверојатно можност да влијае за семејната фирма да добие тендер кој што ќе биде платен од парите на граѓаните – вели Арсовски.

Арсовски вели дека бидејќи вчера Бочварски се заканил на социјалните мрежи дека ќе го тужи токму него, најверојатно иритиран што јавноста дознала за какво семејство станува збор во штипско и како функционира, тој јавно го повикува да го тужи и на Суд да појасни дали неговото семејство земало ваков милионски тендер од институцијата или не земало. Таму ќе има шанса да докаже.



Слични Објави