БНТ: Програмата за враќањето на посмртните останки на цар Самуил достигнала до 794.000 гледачи

Специјалната програма на Бугарската национална телевизија „Цар Самуил: Враќањето“, посветена на враќањето на посмртните останки на цар Самуил во Бугарија, достигнала 794.000 гледачи, 29,5 проценти просечен удел во телевизиската публика и повеќе од 3,5 милиони прегледи на интернет-платформите на БНТ, соопшти бугарскиот јавен сервис.

Делот од петчасовната вонредна програма емитуван на БНТ 1 од 12:00 до 15:40 часот во просек го следеле 307.700 гледачи во целната публика над четиригодишна возраст. Податоците се од GARB Audience Measurement Bulgaria.

За време на преносот во живо, содржините објавени на социјалните мрежи и дигиталните платформи на БНТ достигнале повеќе од 1,5 милиони корисници, додека bnt.bg и bntnews.bg забележале 100-процентно зголемување на посетеноста во однос на вообичаеното ниво. Речиси 24 часа по емитувањето бројот на прегледи надминал 3,5 милиони.

Според БНТ, телевизијата била единствениот бугарски медиум што во целост во живо го следел официјалното предавање и враќањето на посмртните останки на цар Самуил.

Екипата предводена од Бојко Василев ја следела церемонијата во Музејот на византиската култура во Солун, летот со воено-транспортниот авион „Спартан“ и пречекот на аеродромот „Васил Левски“. Продукцијата била реализирана со 50 камери, од кои 40 на терен во Бугарија и Грција и 10 во студијата на БНТ.

Телевизијата обезбедила сигнал и за други медиуми во Бугарија и во странство преку новинарската размена на Европската радиодифузна унија. Во рамките на програмата биле испратени повеќе од четири часа и 30 минути пренос во живо и четири одделни прилози. Со тоа бројот на материјали доставени за меѓународна размена од објавувањето на веста за враќањето на цар Самуил достигнал девет.

„Цар Самуил: Враќањето“ го следеше целиот пат на посмртните останки – од нивното официјално предавање од грчката на бугарската држава во Солун, преку пречекот во Софија и државната церемонија, до положувањето во базиликата „Света Софија“.

Специјалното студио со водителката Аделина Радева го следеше развојот на настаните во реално време, со учество на историчари, археолози и новинари и директни вклучувања од повеќе локации долж маршрутата.