Борисов: Не сме непријатели со Северна Македонија, договорот треба да се почитува

Лидерот на ГЕРБ, Бојко Борисов, изјави во Русе дека Бугарија и Северна Македонија не се непријатели и дека Договорот за добрососедство и пријателство меѓу двете земји треба да се почитува.

„Има Договор за добрососедство и пријателство со Република Северна Македонија, потпишан од мене и од нивниот премиер. И ние и Европската комисија не бараме ништо друго освен да се почитува овој договор. Ние не сме непријатели, туку токму спротивното“, рече Борисов, пренесе БГНЕС.

Тој посочи дека договорот предвидува права и се осврна и на таканаречениот француски предлог.

„Уште повеќе, Договорот дава права. Потоа и францускиот предлог – сè е апсолутно јасно“, изјави Борисов.

Лидерот на ГЕРБ го наведе како пример односот кон Грција во периодот на пристапувањето на Бугарија во Европската Унија и повика на конструктивен дијалог со дипломатски средства.

„Ние не сме непријатели, токму спротивното. Ако го разбираат соседството така како што го разбираме ние, нема да имаат никакви проблеми“, додаде Борисов.