Бугарија е меѓу водечките земји во регионот по број на роботски операции на рак на простатата

Ракот на простата е најчестото онколошко заболување кај мажите во Бугарија, со најмалку 3.500 нови случаи годишно, а значителен дел се откриваат во напредна фаза. Според Марин Георгиев, началник на Клиниката по урологија во УМБАЛ „Александровска“, клучот за успешно лекување е навременото откривање.

„Кога ракот на простатата се открие во рана фаза, оперативното лекување може да доведе до трајно излекување“, изјави Георгиев, додавајќи дека хируршкото лекување е „платиниумски стандард“, дополнето со радиотерапија, имунотерапија и хормонска терапија.

Тој посочи дека Бугарија е меѓу водечките земји во регионот по број на роботски операции, со околу 1.600–1.700 интервенции годишно, а дел од центрите работат на светско ниво. „Бугарските пациенти не треба да бараат лекување во странство, бидејќи кај нас постојат центри со врвен квалитет“, нагласи Георгиев.

Според него, напредокот во роботската хирургија овозможува побрзо закрепнување – неколку дена болнички престој и до две недели домашно лекување, со висока стапка на преживување, особено при рано откривање.

Тој упати апел до мажите: „Секој маж по 50 години треба еднаш годишно да се прегледува, дури и без симптоми“, а кај лица со наследен ризик контролите да започнат по 45-та година.

Георгиев истакна и дека вештачката интелигенција сè повеќе се користи во урологијата, особено за предвидување на исходот од третманот и за подобрување на хируршката прецизност во иднина.