Бугарија е меѓу земјите со најдобар квалитет на водите за капење во ЕУ

Во 2025 година, 85% од водите за капење во Европа биле оценети со „одличен“ квалитет, најстрогиот стандард во ЕУ, покажува годишниот извештај на Европската комисија за состојбата на водите за капење, јавува БГНЕС.

Според извештајот, 96% од сите мониторирани места за капење во ЕУ ги исполнуваат минималните стандарди за квалитет, додека само 1,5% се оценети како „лоши“. Општиот квалитет на водите за капење останал стабилен во споредба со претходната година.

Највисок удел на води со одличен квалитет е регистриран во Австрија, Бугарија, Кипар и Грција, каде што тој изнесува 95% или повеќе. За Бугарија, процентот е 96,9%, соопшти Европската комисија.

Од Комисијата посочуваат дека високиот квалитет на водите е резултат на долгорочното влијание на европското законодавство, подобреното следење и управување, како и инвестициите во пречистителни станици и подобро собирање на отпадните води.