Бугарија го доби третото плаќање од Националниот план за закрепнување и отпорност во износ од 1,47 милијарди евра

Бугарија денеска го доби третото плаќање по Националниот план за закрепнување и отпорност во износ од 1,47 милијарди евра. Плаќањето беше извршено откако Европската комисија оцени дека се исполнети 48 етапи и цели од вкупно 50 вклучени во барањето за плаќање, соопшти владината прес-служба, пренесува БГНЕС.

Третото барање за плаќање по Планот опфаќа 22 реформи и 19 инвестиции и е најголемото поднесено досега. Клучните мерки, опфатени со него, се поврзани со продолжување на реформите во области како што се научните истражувања и иновациите, декарбонизацијата, јавните набавки, подобрувањето на рамката за управување со државните претпријатија, развојот на електронското управување, електронското здравство и други.

Ова е второто плаќање извршено кон Бугарија во мандатот на владата. Со него, средствата добиени во текот на годината од Европската комисија вкупно изнесуваат 1,9 милијарди евра, што надминува повеќе од половината од вкупната алокација по Планот за закрепнување. За повеќе од три пати се зголемени и исплатените средства кон корисниците од почетокот на годината – од 1,5 милијарди на 4,5 милијарди лева. Во текот на следната година Бугарија треба да ги поднесе финалните четврто и петто барање за плаќање по механизмот.