Бугарија го презеде претседателството со Парламентарното собрание на ПСЈИЕ: Евроинтеграцијата и регионалната поврзаност во фокусот

Бугарија официјално го презеде претседателството со Парламентарното собрание на Процесот за соработка во Југоисточна Европа (ПСЈИЕ), што ќе трае една година. Ова е четврти пат Бугарија да ја преземе оваа улога од основањето на механизмот, јавува БГНЕС.

Главниот директор на Дирекцијата за европски прашања при бугарското МНР, Јордан Прванов, изјави дека ПСЈИЕ претставува важна платформа за градење на добрососедски односи во регионот, а бугарското претседателство ќе се води од четири клучни приоритетни групи.

Првиот и основен приоритет е поддршката на евроинтеграцијата на земјите од регионот. Според Прванов, патот кон ЕУ треба да биде базиран на индивидуални заслуги и постигнувања на секоја земја-кандидат.

Втората група приоритети се однесува на подобрување на конкурентноста и развој на човечкиот капитал. Претседателството планира активности за унапредување на научноистражувачката работа и поттикнување соработка помеѓу образованието и бизнис секторот.

Третиот приоритет е зајакнување на енергетската и транспортната поврзаност во регионот. Прванов истакна дека завршувањето на клучни инфраструктурни проекти со регионално значење е една од целите на бугарското претседателство.

Како четврта приоритетна насока се наведува борбата против хибридните закани и дезинформациите, кои претставуваат сериозен предизвик за стабилноста во регионот.

Претседателката на бугарското Народно собрание, Наталија Киселова, која беше во Тирана за свечено преземање на претседателството, подвлече дека ПСЈИЕ треба да биде платформа за обединување, а не за конфликти. Таа додаде дека исполнувањето на Копенхашките критериуми останува неопходен услов за пристапување во ЕУ.

Во следната година, додека Бугарија ја извршува оваа улога, ќе се одбележи и 30-годишнината од формирањето на ПСЈИЕ – иницијатива што започна токму во Бугарија во 1996 година.