Бугарија и САД гледаат потенцијал за стратешко партнерство во одбраната и енергетиката

Бугарија и САД гледаат потенцијал за стратешко партнерство во областа на одбраната, енергетиката, иновациите, високите технологии и вештачката интелигенција, изјави заменик-министерот за економија Красимир Јакимов на третата регионална економска конференција, организирана од Американската трговска комора.

Јакимов истакна дека Бугарија не е периферија, туку стратешка инвестициска дестинација, ориентирана кон европското и евроатлантското партнерство. Според него, целта на владата е земјата да се претвори во технолошки и индустриски центар, врз основа на геополитичкиот потенцијал, квалификуваниот кадар и конкурентните индустриски зони.

„Сега е моментот овој потенцијал да биде реализиран во вистинска економска сила. Ние не се натпреваруваме за инвестиции од минатото, туку за инвестициите на иднината“, изјави Јакимов, посочувајќи ги високотехнолошкото производство, вештачката интелигенција, центрите за податоци, иновациите, модерната енергетика и инфраструктурата како клучни области.

Тој нагласи дека САД се не само стратешки сојузник, туку и значаен економски партнер на Бугарија, со успешен бизнис во земјата и перспективни работни места.