Бугарија и Северна Македонија потпишаа План за соработка во здравството за периодот 2026–2028 година
Министерката за здравство на Бугарија, Катја Ивкова, и нејзиниот колега од Република Северна Македонија, Сашо Клековски, во Софија потпишаа План за соработка меѓу двете министерства за периодот 2026–2028 година. Документот предвидува заеднички иницијативи, размена на медицинска експертиза и развој на партнерството во областа на здравството и медицинската наука, јавува БНТ.
Планот ја надградува Спогодбата меѓу владите на двете држави, потпишана на 20 октомври 2000 година во Софија.
„Иднината на здравството не ја одредуваат границите меѓу државите, туку нашата способност да ги обединуваме знаењата, технологиите и експертизата во интерес на пациентите. Бугарија има потенцијал да биде двигател на регионалната соработка во медицината. Нашата амбиција е Планот што го потпишавме денес да се преточи во конкретни проекти со мерливи резултати. Зашто вистинската вредност на секоја спогодба не се мери со потписите на неа, туку со придобивките за луѓето“, изјави министерката Катја Ивкова.
„Нашите здравствени системи се соочуваат со слични предизвици, а споделувањето искуства и добри практики ни овозможува да наоѓаме поефикасни решенија. Верувам дека директните контакти меѓу здравствените установи и медицинските стручњаци ќе му дадат нов поттик на нашето партнерство и ќе придонесат за поквалитетна и подостапна медицинска помош“, нагласи министерот Сашо Клековски.
По потпишувањето, двајцата министри ја посетија Специјализираната болница за акушерство и гинекологија „Мајчин дом“ во Софија, каде што ги пречека извршниот директор, проф. д-р Иван Костов, доктор на медицински науки и раководител на Катедрата за акушерство и гинекологија на Медицинскиот универзитет во Софија. Тие ја разгледаа Клиниката за неонатологија и се запознаа со грижата за новороденчињата и предвремено родените деца.
Во посетата учествуваа д-р Веселин Дјаволов, заменик-директор за здравствена и дијагностичка дејност; доц. д-р Станислава Хитрова, раководителка на Одделението за интензивна нега на Клиниката за неонатологија; проф. д-р Асен Николов, раководител на Родилната клиника и претседател на Бугарското здружение за акушерство и гинекологија; и доц. д-р Ирена Брадинова, раководителка на Националната генетска лабораторија.
Меѓу главните теми на разговорите беа пренаталната дијагностика, масовниот неонатален скрининг и брзата геномска дијагностика. Беа разгледани можностите за заеднички пилот-проекти, споделување на лабораториските капацитети и проширување на скрининг-програмите со дополнителни наследни заболувања што можат да се лекуваат.
Беа разгледани и перспективите за партнерство во областа на роботизираната гинеколошка хирургија и онкогинекологијата. Посетата ги истакна практичните можности за спроведување на договорената соработка преку заеднички медицински проекти во корист на пациентите од двете држави.
