Бугарија инвестира над 1,5 милијарди евра во модернизација на железничката линија Софија – Ѓуешево

Бугарија започнува стратешки проект вреден повеќе од 1,5 милијарди евра за модернизација на железничката линија Софија – Ѓуешево, која е дел од европскиот транспортен коридор „Западни Балкани – Источно Средоземје“, јавува 24 часа. Овој проект ќе обезбеди брза железничка врска со Скопје и Тирана, изјави вицепремиерот и министер за транспорт и комуникации Гроздан Караџов за време на министерска конференција во Софија, на која тој беше домаќин.

Темата на конференцијата беше забрзување на транспортната поврзаност во Југоисточна Европа, како дел од бугарското претседателство со Процесот за соработка во Југоисточна Европа.
„Регионалната поврзаност е во срцето на нашето претседателство. Таа е главен двигател на економскиот развој, безбедноста и интеграцијата на регионот во европските мрежи,“ истакна Караџов при отворањето на форумот.

Министерот додаде дека паралелно се работи и на модернизацијата на линијата Софија – Калотина со европско финансирање, а со Анкара се напредува по проектот за нова железничка врска Јамбол – Елхово – Лесово – Одрин.
„Тоа е нашата визија за вистинска регионална поврзаност,“ нагласи тој.

Караџов потсети дека веќе е завршен последниот дел од автопатот „Европа“, а следен голем инфраструктурен приоритет ќе биде автопатот „Црно Море“, со огромно значење за товарниот и патничкиот сообраќај север–југ.
„Планираме нов автопат што ќе почнува од Русе, ќе минува под Стара Планина и ќе стигнува до нашата јужна граница,“ додаде министерот.

Развојот на пристаништата Варна и Бургас останува меѓу водечките приоритети на бугарската влада.
„До крајот на 2025 година ќе започнеме постапка за јавно-приватно партнерство за терминалите Варна-Исток и Варна-Запад. Тие ќе станат клучни логистички порти меѓу Европа и Азија, како дел од Транскаспискиот (Среден) коридор,“ изјави Караџов.

На конференцијата учествуваа министрите за транспорт од Анкара, Атина и Приштина, државни секретари од Букурешт, Белград, Скопје и Подгорица, како и генералниот секретар на Меѓународниот транспортен форум, Јонг Тае Ким, и претставници на дипломатски мисии во Софија од земјите членки на Процесот за соработка во Југоисточна Европа.