Бугарија освои четири медали на Меѓународната олимпијада по информатика во Ташкент
Бугарскиот национален тим освои четири медали – еден златен, еден сребрен и два бронзени – на Меѓународната олимпијада по информатика во Ташкент, Узбекистан, соопшти Здружението на олимписките тимови по природни науки, пренесува БНР.
Златниот медал го освои Андреј Стефанов, ученик во 11-то одделение во Првата приватна математичка гимназија во Софија, кој годинава освои злато и на Меѓународната олимпијада по математика.
Сава Делев, ученик во 10-то одделение во истото училиште, освои сребрен медал. Со бронза се закитија Кирил Зуљамски, деветтоодделенец од Софиската математичка гимназија, и Александар Пендов, ученик во 10-то одделение во Математичката гимназија „Акад. Кирил Попов“ во Пловдив.
Бугарија е основач и прв домаќин на Меѓународната олимпијада по информатика, одржана во Правец во 1989 година, а во 2029 година повторно ќе биде домаќин на натпреварот.
