Бугарската еврејска организација „Шалом“ ќе го популаризира уникатниот чин на спасувањето на бугарските Евреи

Бугарскиот премиер Румен Радев се сретна со новото раководство на Организацијата на Евреите во Бугарија „Шалом“. На разговорот присуствуваа претседателката на организацијата, д-р Алина Леви, и Николај Галабов, соопшти владината прес-служба, пренесува Радио Бугарија.

Претставниците на „Шалом“ му ја честитаа на Радев убедливата победа на парламентарните избори и му посакаа успех во работата на новата бугарска влада.

Тие истакнаа дека, како што дошло до промена во државното раководство на Бугарија, промена се случила и во раководството на организацијата. Новото раководство ќе настојува да го врати „Шалом“ кон неговата основна мисија – зачувување на еврејскиот начин на живот во заедницата и нејзиниот конструктивен придонес кон бугарското општество и држава.

Претставниците на организацијата нагласија дека ќе работат на воспоставување активен и целосен дијалог со сите бугарски институции, како и на одржување на културните и духовните врски со заедницата на бугарските Евреи во Израел.

За време на средбата, претставниците на „Шалом“ ја поддржаа идејата на премиерот Румен Радев бугарски историчари да соработуваат со институтот „Јад Вашем“. Целта е подлабоко истражување и популаризирање на историските факти поврзани со уникатниот чин на спасувањето на еврејската заедница во Бугарија за време на Втората светска војна, пренесуваат БТА и БГНЕС.