Бугарската министерка за труд и социјална политика Наталија Ефремова најави нов повик за лица со бугарско потекло кои сакаат да живеат и да работат во Бугарија

Бугарското Министерство за труд и социјална политика планира нов повик во рамките на иницијативата „Ја избирам Бугарија“, наменет за лица со бугарско потекло кои сакаат да се населат и да работат во земјата. Ова го соопшти министерката за труд и социјална политика на Бугарија, Ефремова на отворањето на форумот „Европа е со мене“, организиран во рамките на Програмата „Развој на човечките ресурси“ при Министерството. Преку оваа програма се финансира и иницијативата „Ја избирам Бугарија“.

„Со оглед на успехот на оваа иницијатива, ќе објавиме мерка со малку поинаков фокус“, рече Ефремова.

Третата компонента на иницијативата ќе биде наменета за млади луѓе со бугарско потекло кои студираат на високообразовни установи во Бугарија, меѓу кои и бесарапски Бугари и млади од Западните покраини.

Во моментов се спроведува втората компонента, чија цел е да ги поттикне луѓето да се преселат од големите градови во помалите населени места. Мерката предвидува поддршка за оние што почнуваат да работат во населени места со помалку од 50.000 жители. Само во првите денови од нејзиното спроведување биле поднесени повеќе од 150 пријави.

„Целта е повеќе од јасна – да го запреме иселувањето од големи подрачја во нашата земја за да можат и компаниите да се вратат таму и да отвораат сè повеќе работни места“, нагласи министерката.

Првата компонента на иницијативата беше наменета за Бугарите кои живеат и работат во странство и сакаат да се вратат во земјата. Иако првично било планирано да бидат опфатени околу 1.000 учесници, во Бугарија се вратиле 1.600 лица од САД, Европа и Азија.

„Многумина од нив избраа да се населат не само во големите градови, туку и во помалите населени места, каде што најдоа работа или започнаа сопствен бизнис“, додаде Ефремова.