Бугарската оперска прима Рајна Кабаиванска – почесен гост на откривањето на сезоната на Римската опера со „Тоска“ на Пучини

Легендарната бугарска оперска прима Рајна Кабаиванска беше почесен гост на свеченото отворање на новата сезона на Римската опера со изведбата на „Тоска“ од Џакомо Пучини. Настанот беше посветен на 125-годишнината од премиерата на оперското ремек дело, одржана во јануари 1900 година токму во Рим, јавува БГНЕС.

Оригиналната сценска постановка на Адолф Хохенштајн беше внимателно реконструирана од Карло Сави (сценографија) и Ана Бијажоти (костими), под режисерската палка на Алесандро Талеви. Главните улоги ги толкуваа Елеонора Бурато, Џонатан Тетелман и Лука Салси – уметници од највисок ранг во современиот оперски свет. Диригент беше Антонио Фољани, кој во последен момент го замени Даниел Орен поради ненадејно здравствено нерасположение.

Претставата, емитувана во живо на италијанската телевизија РАИ, постигна рекордна гледаност со повеќе од половина милион гледачи.

Райна Кабаиванска пристигна во театарот во придружба на д-р Георги Текев, извршен директор на Нов бугарски универзитет, со кого пред 25 години ја создадоа прочуената „Школа Кабаиванска“. Ѕвездата на светската оперска сцена беше топло пречекана од директорот на Римската опера Франческо Џамброне, уметничкиот директор Алесандро ди Глорија, претставници на италијанската влада и градските власти, како и од стотици нејзини обожаватели.

Во антрактот по првото дејство, Кабаиванска се појави во телевизискиот пренос со емотивен коментар:

„Музиката на Пучини е вистински театар. Уште со првите ноти се пренесуваме во театарската атмосфера и остануваме таму. Среќна сум што оваа моја ‘Тоска’, која ја изведував во оригиналната сценографија, продолжува да живее и денес.“

Меѓу официјалните гости беа градоначалникот на Рим Роберто Гуалтиери, заменик-министерот за култура Џанмарко Маци, како и претставници на политичкиот и бизнис елит, и ѕвезди од италијанскиот шоубизнис.

„Секогаш е голема чест и радост последната дива на операта да биде во својот театар, кој ги памети нејзините големи успеси!“ – изјави Франческо Џамброне.

Во новата сезона на Римската опера ќе настапат и две ѕвезди кои потекнуваат од мајсторските класови на Рајна Кабаиванска во Нов бугарски универзитет – Марија Агеста и Вероника Симеони.