Бугарската влада најави помош за граѓаните и бизнисот поради високите цени на горивата

Бугарската влада најави мерки за поддршка на граѓаните и бизнисот поради зголемените цени на горивата. Директна финансиска помош ќе добијат најранливите домаќинства, соопшти бугарскиот премиер Андреј Ѓуров.

„Тие ќе зависат од приходите и од тоа какви се флуктуациите на цените на нафтата на светските пазари“, изјави Ѓуров.

За оваа мерка владата засега издвојува 30 милиони евра, а исплатата ќе се врши директно на сметките на граѓаните.

Министерот за финансии Клисурски изјави дека преку податоците на Националната агенција за приходи ќе се утврди кои лица имаат право на помошта. „На овој начин ќе се намали притисокот врз цените и ќе се спречи тие поскапувања да доведат до повисоки инфлациски очекувања“, рече тој.

За бизнисот, владата планира да го одложи планираното зголемување на ТОЛ-таксите од 1 април. Министерката за економија Ирина Штонова изјави дека за тоа веќе се водат разговори со Европската комисија.

Владата подготвува и дополнителни мерки доколку цените на енергенсите значително пораснат, вклучително и можност за поддршка на бизнисот поради високите цени на електричната енергија. Премиерот нагласи дека во моментов цените на горивата во Бугарија се меѓу најниските во Европа и дека ќе се зајакне контролата за да се спречат шпекулациите со цените.