Бугарски дронови беа користени за време на меѓународна воена вежба на полигонот „Корен“ во Бугарија
За време на меѓународна воена тактичка вежба на полигонот „Корен“ во Бугарија одржана од Втора тунџанска бригада на бугарските копнени сили за првпат беа употребени бугарски беспилотни летала за разузнавање и означување цели, баражна муниција и антидрон-систем, јавува Армимедија.
Меѓу новите средства е системот ТЕРЕС-02, составен од копнена станица и летало со камера за дневно и ноќно набљудување. Леталото има плафон од 4,5 километри, распон на крилјата од 3,8 метри и дострел од 60 километри со една антена, односно до 120 километри во зависност од опремата. Може да пренесува податоци во реално време, да открива возила со загреани мотори и има радар што овозможува набљудување низ облаци. За полетување и слетување му е потребна рамна површина долга околу 300 метри.
Оператори на системот беа војникот Пламена Поштова и помладиот водник Десислав Гернилов од Втората механизирана бригада. Според Гернилов, на вежбата го извидувале предниот крај на противникот и му доставувале податоци за неговите сили, вооружување и техника на командантот на бригадата.
Антидрон-системот, со кој управуваше војникот Марио Стојанов, открива беспилотни летала на растојание од околу седум километри. Системот ги утврдува моделот и работната фреквенција на леталата, а пријателските дронови ги внесува во посебна база. Со сопствено напојување може да работи од седум до осум часа без генератор.
