Бугарски и грчки војници одржаа заедничка обука во Килкис
Во периодот од 12 до 18 октомври 2025 година, припадници на 38. механизиран баталјон од 2. механизирана бригада на Копнените сили на Бугарија спроведоа заедничка воена обука со единици од Вооружените сили на Република Грција. Настанот се одржа во Националниот центар за урбана борба во градот Килкис, јавува инфоцентарот на Министерството за одбрана на Бугарија.
Обуката беше дел од курсот на тема „Борба во урбани услови“, кој вклучуваше тактички вежби за извидување, патролирање и прочистување на населени места. Паралелно со тоа, војниците реализираа стрелачки вежби на кратки и ултракратки растојанија, со посебен акцент на блиска борба и дејствија во затворени простори.
Според организаторите, обуката поминала во дух на партнерство и заемна почит, придонесувајќи за зголемување на оперативната интероперабилност и градење доверба меѓу бугарските и грчките вооружени сили.
